Esperanto-Kongreso 2025 • Nantes

Aliaj animadoj

Bruno Robineau — 2025-04-01T09:21:24Z

La Klimata Mozaiko

La Klimata Mozaiko estas serioza kolektiva ludo, kiu permesas al ĉiuj malkovri kiel funkcias la monda varmiĝo, kaj la malsimplajn rilatojn inter ties kaŭzoj kaj efektoj.

Kun viaj teamanoj, vi havos tri horojn por trovi la rilatojn inter la kartoj de la ludo, lerni kaj diskuti pri la klimata ŝanĝiĝo kaj ĝiaj solvoj !

Lunde posttagmeze de la 14a ĝis la 17a.

Por junuloj

Bruno Robineau — 2025-02-18T16:31:54Z

JEFO (Junulara Esperanta Franca Organizo) organizos junularan programon dum la kongreso.

Se vi estas junulo kaj volas proponi programeron, nepre kontaktu nin ĉe info@esperanto-jeunes.org

Jam : Gabin kuntrenos vin en sian ses-monatan vojaĝon petveturante tra Eŭropo renkonte al ĉiuaĝaj esperantistoj, per sia filmo « Esperante Eŭropen – Mia vojaĝo al la malkovro de Esperanto ».

Antoine proponos kolektivan ludon por pripensi la klimatŝanĝiĝon « La Klimata Mozaiko ».

Daŭrigota...

Vesperoj

Bruno Robineau — 2025-01-24T21:19:10Z

Sabate : Muzika rikolto el la tuta mondo – balo : popolaj kaj bretonaj dancoj

Marie kaj Jodie, la muzikistinoj de la grupo Abeloj, vojaĝigos nin en la tuta mondo tra landoj, kie ili rikoltis muzikojn kaj kanzonojn : juda lulkanto, tradicia greka kanto kun freneza ritmo, alĝeria kanzono, sveda melodio… Ili kantos diverslingve, interalie en esperanto.

Poste, okazos balo kun popolaj kaj bretonaj dancoj.

Dimanĉe : koncerto de Kajto

Ne plu bezonas prezenti Kajto-n en Esperantio ! Dum siaj koncertoj tra la tuta mondo, Ankie kaj Nanne ĉiam plezurigas la aŭskultantojn dank' al sia energio kaj bonhumoro. Ilia repertuaro baziĝas sur popolaj muzikoj elvokantaj la maron (ili venas el Nederlando), ĉiutagajn eventojn, poemojn… Profitu je vespero plena je komunikema ĝojo.

Programo

Bruno Robineau — 2025-01-24T20:29:43Z

Ĉi tie vi trovos la ĉefajn elementojn de la (provizora) programo. Alĝustigoj kaj klarigoj povos aperi en la venontaj semajnoj.

Vendredo la 6a de junio : antaŭkongresa ekskurso en Saint-Nazaire (vidu en la paĝo Ekskursoj)

Sabato la 7a de junio

8h30 : Malfermo de la akceptejo
9h30 – 10h30 : Lingvo-ludoj por babilantoj
10h00 - 11h30 : Kunveno de la Federacio Esperanto-Bretagne
10h30 – 11h30 : Kurso por komencantoj
10h30 – 11h30 : Prelego : Historio de Nanto : duvizaĝa urbo
11h45 – 12h15 : Malfermo de la kongreso sekvata de honorvino
Libera tagmanĝo
14h30 – 16h00 : Prelego « Jules Verne kaj Esperanto » - Istvan Ertl
14h30 - 16h00 : EDE - Eŭropo-Demokratio-Esperanto - Laborkunsido por aktivuloj
15h00 – 17h00 : Ekskursoj 1 (historia Nanto : la urbocentro) kaj 2 (la kajoj kaj « les Machines de l'île » « la Insulaj Maŝinoj ») - PLENAJ
16h00 – 18h00 : Komitatkunsido de Esperanto-France
16h00 - 18h30 : Komisiono pri Esperanto kaj Lingvoj de Les Écologistes (malfermata al ĉiuj pri la temo : Ampleksigo de nia temaro por plifortigi nian videblecon en la Verdaj Partioj)
16h30 – 18h00 : Kant-ateliero kun Kajto
18h30 : Aperitivo per salaj/sukeraj regionaj pladoj alportitaj de la kongresanoj
Libera vespermanĝo
20h00 : Tutmondaj kantoj kun la grupo Abeloj – Balo : popolaj kaj bretonaj dancoj

Dimanĉo la 8a de junio

9h00 – 9h45 : Ridjogo
9h00 – 9h45 : Ekumena renkontiĝo
9h00 – 9h45 : Informado pri la ekzamenoj de Franca Esperanto Instituto
10h00 – 12h00 : Ĝenerala Asembleo de Esperanto-France
12h15 – 14h00 : Tagmanĝo : bongusta vojaĝo en Grekio kaj Turkio
14h30 – 15h30 : Kurso por komencantoj
14h30 – 16h00 : Prezentado de la freŝdata esperanta versio de la libro La Mil kaj unu noktoj
14h30 - 16h00 : EDE - Prezento de la movado Eŭropo-Demokratio-Esperanto
15h00 – 17h00 : Ekskursoj 1 kaj 2 - PLENAJ
16h00 – 18h00 : Komitatkunsido Esperanto-France
17h30 - 19h00 : Filmo “Esperante Eŭropen - Mia vojaĝo malkovre al Esperanto” - Gabin Forcier
Libera verspermanĝo
20h30 : Koncerto de Kajto

Lundo la 9a de junio

9h00 – 10h00 : Ateliero pri « origami », la japana arto de paperfaldado
9h00 - 10h00 : Filmo “Lastaj respektoj por opoziciulo Aleksej Navalnij” - filmo en la rusa kun subtitoloj en espéranto - prezentata de Alekseij Salomatov
9h00 – 10h00 : Lingvo-ludoj por babilantoj
9h00 – 12h00 : Ekzamenoj FEI (skriba parto)
10h00 – 11h00 : Kurso por komencantoj
10h00 – 12h00 : Prelegoj pri Lucien Péraire « Eŭroazio per biciklo – 1928-1932 » - Pascal Dubourg-Glatigny
Libera tagmanĝo
13h30 : Ekzamenoj FEI (parola parto)
13h30 - 15h00 : Filmo “Neforgeseblaj momentoj de la UK-2024 en Aruŝo” - Aleksej Salomatov
14h00 - 17h00 : Ludo “La klimata mozaiko”
15h00 – 16h30 : Tanzanio – Rakonto pri renkonto
14h30 – 15h30 : Ekskurso 3 : vizito de la muzeo Jules Verne PLENA
16h00 – 17h00 : Ekskurso 3 : vizito de la muzeo Jules Verne PLENA
17h30 : Ekiro per buso al la kastelo Greziljono por la tri-taga restado
Liberaj vespermanĝo kaj vespero

Ĉiutage la librovendejo de Esperanto-France estos malfermata.

De lundo vespere la 9an de junio ĝis vendredo matene la 13an de junio :
postkongreso en la kastelo Greziljono kun vizito de la Luar-kasteloj en la historiaj provincoj de Anjou kaj Touraine. (vidi la paĝon Postkongreso en Greziljono).

Kunvenoj de asocioj

Se esperantistaj asocioj deziras organizi kunvenojn, ĝeneralajn asembleojn aŭ aliajn dum la kongreso, bonvolu kontakti nin.

Ekzamenoj

Bruno Robineau — 2025-01-24T18:41:39Z

Dum la kongreso, Franca Esperanto Instituo (FEI) organizos ekzamensesion por la unua grado (Atesto pri Elementa Lernado) kaj la dua grado (Atesto pri Praktika Lernado).

La ekzameno okazos lundon la 9an de junio :

Unua grado :
9h00 – 10h00 : skriba parto
Ekde 13h30 : parola parto

Dua grado :
9h00 – 10h00 : gramatika testo
10h00 – 12h00 : skriba parto
Ekde 13h30 : parola parto

Se vi deziras partopreni, bonvolu kontakti Renée Triolle antaŭ la kongreso : triolle.renee@wanadoo.fr

Por pliaj informoj : Franca Esperanto Instituto

Prelegoj

Bruno Robineau — 2025-01-24T15:48:45Z

Jules Verne kaj Esperanto


Jules Verne (fotita de Nadar)

Vojaĝo : unue kun tiu eminenta Nantano Jules Verne, fama aŭtoro de Eksterordinaraj vojaĝoj kaj aktiva simpatianto de Esperanto.

Istvan Ertl parolos al ni pri la rilato de Jules Verne al la internacia lingvo, la rolo de Esperanto en lia lasta manuskripto Esplorvojaĝo , kaj kial la aŭtoro neniam finverkis tiun libron.

Istvan Ertl diras ke li estas fascinita de Jules Verne ekde la aĝo de naŭ jaroj. « Mi legis de li preskaŭ ĉion. Pro li mi fariĝis tradukisto : unue mi volis verki kiel li ; kiam mi komprenis ke tio ne eblas, mi vidis ke restas nur la eblo lin traduki. Mi faris tion pri tri verkoj liaj al la hungara, kaj po unu al Esperanto kaj al la nederlanda. »

Lucien Péraire - Odiseado de la 1930aj jaroj

Poste ni sekvos la spurojn de Lucien Péraire, juna esperantista laboristo, kiu de 1928 ĝis 1932 biciklis tra Eŭropo kaj Azio por « kompreni la kialojn de la militoj ». De Germanio ĝis Japanio li parolis la internacian lingvon. Sperta teknikisto, li inventis provtipon de veturilo por bicikli sur la fervojaj reloj cele al veturado tra Siberio tiam sen ŝoseoj.

Tiu eksterordinara aventuro estis malmulte konata ĝis la freŝdata malkovro de grava dokumentaro (liaj taglibroj, fotoj, poŝtkartoj…). Escepta heredaĵo nun savita kaj disponebla por la publiko dank' al la laboro de tuta skipo kunigita de la Centro Alexandre Koyré. Estas informfonto pri la mondostato, la ĉiutaga vivo de ordinaraj homoj ĉirkaŭ la jaroj 1930, de Eŭropo ĝis Malproksim-Oriento, tra la okuloj de juna amatora antropologo.. Por scii pli : https://peraire.huma-num.fr/eo

Pascal Dubourg-Glatigny, doktoro pri arthistorio kaj esplordirektoro ĉe CNRS, partoprenis tiun imponan savlaboron kiu kunigis sciencistojn kaj esperantistojn. Kadre de du prelegoj li prezentos al ni tiujn du defiojn, tiun de la vojaĝo de Lucien Péraire kaj tiun de la savo de la arkivoj.

Literatura vojaĝo - La libro de la mil kaj unu noktoj

La libro de la mil kaj unu noktoj vojaĝigos nin al Oriento per ties fabeloj kaj legendoj akompane de la bela Ŝeherazad. Tiu ĉefverko de la monda literaturo eldoniĝis en Esperanto en 2024 dank' al tradukado de Daniel Moirand. Belega verko ilustrita per 430 gravuraĵoj de Gustave Doré, Castelli, Foulquier, Gustave Roux, F. Pierdon, kiel en la Hachette eldono de 1865.

Said Baluĉi, redaktoro de la antaŭparolo, kaj Emmanuelle Richard rakontos al ni la historion de tiu mirinda literaturaĵo.

Juna esperantisto ĉirkaŭ Eŭropo

Per sia filmo “Esperante Eŭropen - Mia vojaĝo al la malkovro de Esperanto”, Gabin Forcier proponas al ni sekvi lin dum lia ses-monata vojaĝo petveturante ĉirkaŭ Eŭropo, de Francio ĝis Danio tra Hispanio, Bulgario, Germanio… Lia celo : renkonti esperantistojn kaj partopreni eventojn por pli bone kompreni tiun komunumon.

Tanzanio : rakonto pri renkonto

Ni vojaĝos ankaŭ al Afriko, pli precize al Tanzanio pere de « Rakonto pri renkonto ». Dank' al Esperanto, bela interrilato kreiĝis antaŭ pluraj jaroj kun la urbestro de vilaĝo proksima al la lago Viktoria.

Historio de Nanto

Por pli bone aprezi vian viziton de Nanto, Luc Gouverneur proponos al ni prezenton de ĝia historio. Historio de Nanto, duvizaĝa urbo -Tra portretoj de pli-malpli famaj nantanoj, ni malkovros la historion de la urbo, de la prahistorio ĝis la nuntempo.